Novas
-
Xullo, Mes de Patria no Concello de Fene
Cun concerto a cargo de Ukestra do Medio comeza este venres o ciclo “Xullo, mes da patria” que engloba toda a programación organizada pola Concellería de Cultura de Fene até finais do mes de xullo. O ciclo inclúe as catro actuacións de narración oral e música de “Humor Peregrino”, actividade incluída no proxecto Viñetas do Camiño que o Concello de Fene está a desenvolver dentro do programa “O Teu Xacobeo” da Xunta de Galicia. Tamén se anuncian concertos de Sito Sedes coa Garufa Blue Devils (21 de xullo), de Sés (22 de xullo) e Amadeus, a propósito do seu 30º aniversario (24 de xullo). E, para completar o programa, o 20 de xullo Fene acollerá o acto de entrega dos Premios Rosalía de Castro de Lingua, da Deputación da Coruña, que nesta edición recaeron -na categoría de “Persoas”- na figura do debuxante fenés Xaquín Marín. E o 23 será a inauguración da exposición de Viñetas do Camiño, na que se poderá ver unha escolma dos debuxos realizados polos artistas convidados á Andaina debuxada do pasado mes de xuño.
-
Espectáculo de clown e malabares, este venres en San Valentín con Moc Moc Saltimbanqui
“Apuntando ao corazón” é o título do espectáculo que o clown Moc Moc Saltimbanqui presentará este venres, 25 de xuño, ás 21.00 horas na Praza do CPS de San Valentín (entre os bloques 11 e 12). A función vai dirixida a todos os públicos, con entrada libre, de balde e aforo limitado, segundo a normativa COVID. Mazas, pelotas, lume, un paraugas, equilibrio e enerxía delirante “son as claves deste show que xa deu a volta ao mundo”.
-
A Banda do Verán leva o seu espectáculo de danza, música e clown á Casa da Cultura de Fene
Danzamos no verán!!! é o espectáculo que o vindeiro xoves, 24 de xuño, presentará “A banda do verán” en Fene. A actividade, dirixida a público de educación infantil e primaria, comezará ás 12.30 horas no salón de actos da Casa da Cultura, con entrada de balde e aforo limitado, segundo a normativa COVID19. Para asistir a esta función, cómpre facer reserva de praza na Biblioteca Municipal, do 17 ao 23 de xuño, presencialmente ou no teléfono 981 342 302.
En “Danzamos no verán!!!” mestúranse a música e a danza con elementos teatrais ou de clown. Trátase dun espectáculo participativo cheo de música, de historias, de danza e coreografías que mergullan aos rapaces e rapazas nunha divertida festa e nun soño de verán…. O show está creado a partir do libro disco “Estamos no verán” da Editorial Galaxia (nomeado como mellor álbum en lingua Galega nos “VI Premios de la Música Independiente”). Estilos como o funk, o rock, o pop, o reggae ou a bossa nova atópanse neste espectáculo recomendado para os nenos e nenas de educación infantil e primaria.
A Banda do Verán está formada por músicos profesionais de contrastada solvencia que á súa vez exercen a docencia e que salientan pola súa experiencia laboral e didáctica na música e no teatro infantil. Desde o ano 2007 levan os seus espectáculo por toda Galicia e Portugal.
